Qamaan Bulxan oo ay Xabashiyi Herar ku xidhay xilliggii Giri-Girida la odhan jiray ayaa fariin faray Maxamuud Ciye oo ahaa nin Reer Ciideed ah Qamaanna ay isku raas ahaayeen. Qamaan wuxuu tolkii u sheegayaa inay isu soo ururaan cadaawad badan oo jirta awgeed. Gabaygan isagoo wada dhan ma hayno wuxuuse yidhi inta eega naga soo gaadhay:
- Maxamuud Ciyow talo adduun, miririg weeyaane
- Waa waxaan masuubana la’ayn, laguna maanshoone
- Hadba adiga oo moog unbuu, mahayin aaraaye
- Oo soo mudh odhan duul madow, milaygi Dayreede
- Ma moodaynin middanaa kuugu xigi, maalintii Sirow e
- Waxse aad mari halkii Eebahey, kugu manaystaaye
- Rag aan miidhnay madaxdoo faqday, buu mala khasaarshaaye
- Mudaahano masalo been ah, baa madhisay Daaroode
- Naftanu waxay u maxaboon, halkaan lagu manaabayne
- Maaneed raggii degi jiray iyo, madhay Ogaadeene
- Madheedhkii ku yiil Dhirindhir iyo, Xoddayo waa mowde
- Marta Faaf maldada Ceel Bakool, madhan ciddeediiye
- Waa meyti aakhiro Wardheer, maqadinkeediiye
- Maxaad Roobna Mandooyiyo ka samir, mududkii Caadoode
- Waa marag waxaa ay inagu fureen, dhalad mudkiisiiye
- Magacood ba’ayoow waxaad tihiin, dibbada mayd yaale
- Mashaqowde maatida haddaad, midigta jiidaane
- Soo miilo gaabsada haddaad, qaban kartaan meele
- Ama maala caanaha Bankay, Murug ku dhiiqdaaye
Soo dhamaystir gabayga haddii aad hayso. Intan waxaan ka qoray cajalad uu duubay Cabdullaahi Baddal Cabdi Qamaan.