Gabay gabayada dib-u-heshiinta ee abwaanka ka mid ah oo uu Soomaalida ugu sheegayo in ay Rabbi u noqdaan si ay uga baxaan collaada ku habsatay.  Wuxuu yidhi:

• Dul caagag leh ciid iyo bannaan, ciiri iyo buuro
• Cal guduudan suubaan cantara, amase doox caws leh
• Cinjir dibir leh coolida madow,webi callaalkiisa
• Horweyn cimidha adigoo watoon, ciidan badan haysan
• Cooflaha libaaxiyo adigoo, col uga yaabaaya
• Cawo-daran hadduu kaa lumiyo, goor casar ah geelu
• Carro-edeg cadceedsiga haddaad, meel cabbiri weydo
• Carsaanyada sideedii haddaad, gees kasta u cararto
•  
• Adigoo curaancura jaboo, caga gubyoonaaya
• Hadba waxaad cal fuushaba markaad, socod ku caatooto
• Haddad weydo meel uu cag dhigay, ama cid uu raacay
• Arbacuunka ceesaan cadbaa, loo cammayn jiraye
• Cayni qabadna waa lagu dayaa, caaradkii lumaye
• Bismillah cir-jiidh iyo mariikh, way cartamayaane
• Collooboo siyaariintii way, kala carraabeene
• Geedkii ciddida kaaga jira, waad ka cabataaye
• Caawoo dhan waa kuu cabaad, waana cudur weyne
• Haddii aadan cid soo bixisa helin, caafimaad ma lehe
•  
• Caynkaa waxa ka dhigan hadalka, yaan laysku caardumine
• Kuwaan caano wada nuugnay iyo, waa ciddaan nahaye
• Kala carartay Soomaalidii, calanku saaraaye
• Hadal caraf leh sheekada markii, lagu ogaa caawa
• Cishadii dambiyo yoomka xiga, caasiyaa galo e
•  
• Hadba ciriq qarsoonaan jiraa, soo carcooriya e'
• Waxay ceelka kala soo baxaan, waa car iyo biire
• Bismilaah cir-jiidh iyo mariiq, way cartamayaane
• Collooboo siyaariintii way, kala carraabeene
•  
• Calool-xumadu goortay gashiyo, ciidhadii badatay
• Cirku roobkii wuu naga ceshaday, caadiga ahaaye
• Cayiliyo cadiyo caano ma leh, cuudna waa ebere
• Cadhadii Illaahiyo intaan, cudur na soogaadhin
• Cabsi iyo haddaan lala imaan, camal fal iimaan leh
• Oon la isku soo celin adduun ma calfanaysaane
• Cayni-qabasho Soomaaliyey, gali calooshaada
• Is cafiya haddii kale wanaag, waa cirka u tuure
• Ama cuna carruurtiina iyo, sharafka ciiddiina