• Yaasiinow adigaa dib ugu noqon, dagalladeeniiye
• Dooxii Hargaysaad adigaa, daakhilka u galiye
• Duqaydii markaad gaadho iyo, danabyadii joogay
• Durba Maxamed waa inaad, warkaa ugu dadaashaa
• Adoon dabacsanayn waa inaad, dood u marisaa
• Dalkeenii maqnaa Xabashidii, looga dacaree dheh
• Wiilashaad dirteen waxay noqdeen, rag aan dakaameyn dheh
• Damqashadaba waa rag aan aqoon, oon dabci lahayn dheh
• Dabkii ay shideen wuxuu ahaa, damal aan qiiqayn dheh
• Digtooniday halkaa kaga baxeen, wali ma sii dayn dheh
•  
• Duruustiinii baa lagu socdaa, damina maayaan dheh
• Dadaalkoodu waa sida cagaar, doog usoo baxay dheh
• Dan Soomaali mooye mid kale, dayiba maayaan dheh
• Allay lehe da’dii bay noqdeen, aan ku diirsaday dheh
•  
• Warqadaa daboolkiyo markaad, diirka uga qaado
• Dood kalana waa inaad markaa, dib ugu laabtaaye
• Digtii hore Dhurwaaliyo markii, Qaaxo la is diiday
• Siddeed kaare oy wada dileen, waan dul joogsaday dheh
• Dabaqlaydii way madhatay oo, duugahaa maray dheh
• Doofaarkii iyo way dhinteen, dibigii weynaa dheh
• Maydkoodu wuu daadasanaa, dooxyadoo idil dheh
• Oo haadkii ku dacarooday baa, diiday hilibkii dheh
• Daafidii ay wateen iyo la qaaday, dahabkii saaraa dheh
• Dabkii aan ka furanay kobuu, dadab u yaalaa dheh
• Dacaskii iyo kabihii buudhkiibay, wadar ku doorsheen dheh
• Dirayskiina way wada furteen, dun iyo shaalkii dheh
• Durba saacadii iyo koodhkii bay, dam isku siiyeen dheh
• Fidaa’iyiintu meeshaan u diro, kama dakaamaan dheh
• Dakanada kuwii qabayna, way dabacsanaayeen dheh
• Annagaan ku daynine runtii, way damqanayeen dheh
•  
• Kuwaad adigu daaraha qarxiyo, deynabada siisay
• Meeshay diyaar ugu noqdaan, dib uga faaloo dheh
• Gaadhigay soo diraan iyo markaan, taangigii duminay
• Dacallada Kamiin iyo markii, Boobe lagu daaray
• Dab inay shitaan iyo markaan, daawo uga dhaartay
• Dushaa sare wax heehaabi bay, daraf ka keenee dheh
• Oo Miig samada duuliyo Jet baa, laygu daydayey dheh
• Saldhigii aan degaynay iyo halkii, ay darintu noo tiilay
• Dhaawicii dushaasay aroor, nagu duqeeyeen dheh
• Madficii ay dudada noo dhigeen, ruuxna dili waa dheh
• Gamuunkuu dalbaday Yuusuf, ee dibada noo yiilay
• Dam markay kusiiyaanba, way daba maraysaa dheh
• Diinta unbaa bir noo noqotayoo, lagu difaacaa dheh
•  
• Afartaa wax layskuma daree, deel maka higaadshay
• Durbaan iyo daf iyo muusik iyo, daramal ma u qaatay
• Ma ka daayey deelqaafku waa, kaa dilaa gabaye
•  Doc ka fuulka kaadsiiyahaan, uga door bidaye
• Intaan danafta raadkiisu jiray, anigu doonaayey
• Een daahay la i mood inaan, daayey gabaygiiye
• Kolse haddan dawaarkii rogeen, diiradda u qaato
• Dulucdiyo ujeedada nafwaha, dood-cilmiyadayda
• Danta aan ka leeyahay xikmadan, Daayin igu beeray
• Dabcan inay abwaanadu gartaan, saan u daadagaye
• Ku darso oo mid kale hoo hadaad, daristay taan sheegay
•  
•  Dushii Muli ilaa Daaqatiyo, Erar dillaaceeda
• Dagaal iyo markii weerar iyo, gaadmo lagu deyray
• Geesigu balaynkuu dajiyey, bay dabar go’ qaateene dheh (plan)
• Dhiigoodii durduray laaguhuu, wali duljoogaa dheh
• Degta Fadis, Gobayle-Mujiyo, Julul, webiga daaciisa
• Dalkaa aan hore usoo sheegay baan, diib u soconaa dheh
• Nina laysma diidee xaqaa, lagu dadaalaa dheh
• Dumarkiyo caruurtiyo habluhu, malaha deel-qaaf dheh
• Mahmarkiina waysoo diteen, gaalku duufsaday dheh
• Dalkuna inuu xoroobo yaan rajayn, deyrtan manta ah dheh
• Dusha inaanu calankii sudhnayoon, Adari doonayno
• Oonaan dib uga laabanayna, mari dabuubteeda
• In dagaaladii wali socdaan, mari dabuubteeda
• Daarihii la riday kaamashii, lagu duqaynaayey
• Aar-biigihii lagu dalbaday, mari dabuubteeda (RBG)
• ...

Dhabcan in baa maqan ee soo dhamystir haddii aad hayso.