Nin Ciidagale ah oo aan filayo in la odhan jiray Warfaa Suldaan aanse Faarax Nuur la mustawe ahayn ayaa gabay uu ku maagayo Arab iyo Faaraxba tiriyey.  Wuxuu yidhi:

• Nabsi gudaya Geydhoow la arag, goor la joogaba e

• Guryahaaba lays daba degaa, gu' iyo jiilaale

• Halkuu galo guddoonbaa u dhacay, gaama-ruugyada e

• Gunta kibirtay waagii horaa, laga gol roonaaye

• Inuu Arab garmaamiyo dagaal, gelinba cayn keeno

• Iyo inaan geddaydii sankiyo, dhegaha qaar gooyo

• Rabboow gaalku muu noo fasax,o guga waxaan yeelo

• Guulade iyo Guuleed Suldaan, geesan kala roone

• Goodbuu ku dhaqay aabbahay, gaanbiyoow farase

• Gadhkaagiyo gadhkiisaa sinnaa, Goodiryahow xumiyi

• Gal billaawe iyo baad toshaa, galka weysada e

• Ganbo lama shaqaystee rugtaa, ginigu noo yaalle

Faarax ayaa u jawaabay Warfaa Suldaan oo yidhi:

• Abtirsiinadiinnii guray oo, waa gudboonnahaye

• Hadii godobtayada uumiyaha, geedo loo mariyey

• Anna maan gufaacada ridoon, gaaddanka u reebo

• Gildhigaanka maan liifaddiyo, geliyo baaruudda

• Wixii naga gardaran jeedal maan, gawda kaga saaro

• Kob lagu giirtay meel lagu go'ay oy, Geydho ololayso

• Gammaankana dhacsiga layska wado, labada geesoodba

• Gorgorkuna hilbaha boobayoo, guruxa soo saaray

• Weli Arab garmaamaha dagaal, gucummo Aar yeeshay

• Oo geylamaayaadan arag, goob awaara lehe

• Waxaadse garan gorgor baad tahee, guud-caddaadiga e

• Gal billaawe iyo waan tolaa, galka weysada e

• Labaduba garaad-laawe yahow, waa gob shuqulkeede

• Guunyadu haddii ay baxdo oo, gugu abaaroobo

• Gurboodkaan dhaliyo naagahaan, gego ku deeqaaye

• Shir guddiya haddii reer tolkay, gaar isugu meero

• Aniga iyo toban loo gartaybaa, guurtidaw baxa e

• Oo weliba geeraarka iyo, gabaygu ii dheere

• Halkuu nacasku iga gaabiyaan, garan aqoon waayey

• Sidii roob intuu gaax tirsaday, guban ka soo hooray

• Ama gaaladii Beerdhiga oo, geydh u diriraysa

• Ama Ramad nirgii laga guroo, gubayo oon hayso

• Ama Siig dab lala gaadayoo, geli ku rooraaya

• Ama Aar intuu goonji cunay, gelaya hawdkiisa

• Ama Micis godkii lagu shidoo, gebi ka yeedhaysa

• Ma gam'ee habeenkii hurdada, gawdu waa aniye

• Gadhka malawle Gawdh iyo Tayaag, gurada Xaabaale

• Gabaahiirtii duudkeeda weyn, sii galgalanaysey

• Gumburkii Abaarso iyo Wadne iyo, guban intii eegta

• Galgalaha Jaleelo iyo Hallaye, Gaafka Dararweyne

• Guntiga Shiisha meesha iyo Guguc,  gacan Dhariiryaale

• Halka dhamasku hoos ugu go'o iyo, harada gaagaabaan

• Niman baa gadaaman oo intaa, gaadh ku meersadaye

• Guga dhaw ha laga soo raree, qaalimmo u geeya

• Haddii kalese goolaaftankiyo, guuxa naga daaya

Intaa markuu tiriyey ayuu Faarax wuxuu doorbiday inuu mar labaad ku noqdo gabaygii si uu Warfaa Suldaan u kuhaano.  Gabayaagu waa afku-leeblaa la yidhiyee siduu Faarax Alle weydiistay ayey noqotay oo ninkii libaax baa habayn madow qaaday.  Wuxuu yidhi mar labaad:   

• Gal-dad-liqa ul baa lagu dayaa, laga danbeeyaaye

• Weligiinba ceel dawlis leh yaad, dalaq tidhaahdaane

• Dubbo lagu mergado Reer Aftaag, waa dig siin jiraye

• Dirkii kula dhashiyo aabahaa, kuguma daayeene

• Malaha mid uu Warfaa dayriyey oo, daahan baa tahaye

• Aarkii daboolaan ahay oon, dibbedda joogayne

• Duddada geela wiilkaan sidii, dawri kala boodi

• Ama dooy yaxaas uga dhacaa, waa dad aakhiro e

Waxaan ka helnay Law-Dhaako