Waa taan Cadaadley ka guday, xalay cawayskiiye

Caado iyo intaan Sirow tagaan, caano geel dhamaye

Cosob iyo markaasay Maryama, ila ciyaareene

Citiraafna waan helay sidii, dawlad caadila ahe

Waana lay casuumaday sidii, caalim soo dagaye

Ragna inuu catrado ii dhisuu, iila ciil qabaye

Cisigaa anoo heli karoo cudur, la'aan seexday

Turumbadu markii ay cidee, waaguna caasaaday

Cirkii iyo camuudii markaan, cayn kastaba dhawray

Rag calool xun goortaan arkiyo, calalo taanbuug ah

Carmis inaan ag joogaan gartiyo, wali ciqaabtiiye

Caku aniga ee goormaa wajaaf, laygu soo celiyey

Carradii biyaa iga xidhay oo, waxaan cabaan waayey!

Cadar bay ahaydoo intaa caga, gubyaa i haysay!

Cagaag baa i mudayoo kabaan, cidhibta saaraa dheh!

Shan nin bay casuumaysayoo fiidkii, ma cashayn dheh!

Batar Ceerigaabaan ku jabay, mana ciyaarayn dheh!

Cirka iyo baqoolaan ku tagay, Cadale meeshiisa

Cusbalayna waan soo mariyo, Ceelis gudaheeda

Cimrigayna meeshaan fadhiyo, kama carraabayn dheh!

Cawdaan ku jiifiyo hurdada, caawa kama toosin

Sidaan u caweysimahayuu waagu, ku caddaan dheh!

Niman bay canaantoo haddana, ii calaalcala dheh!

Ceeb baa la ii faafinoo, la ima caayayn dheh!

Hadalkaa calaamada leh waad, la cajabaysaane

Caynkaana waxa iigu wacan, ciilka aan qabo dheh

...