The largest online collection of Somali poetry

Shir lagu qabtay Huurso, Itoobiya, oo ay qawmiyadaha Itoobiya daga ku shirayeen ayuu abaanku gabaygan ka tiriyey.  Markii ay u caddaatay raggii uu hiilka iyo garab-istaaga ka sugayey ee tolkii ahaa inay shisheeye cadow ah iyo gumaysi uun ka amar qaateen dhagtana iyaga mooyee aysan cid kale u raaricinin.  Madaxiisa Alla raajiyee wuxuu yidhi:

• Hagardaamo mooyee Hartiyow, kaama suga hiile
• Wuu kugu habsaama, ninkii kaa isku halayne
• Halla uma taraysaan, kolkay col is hujuumaane
• Wuxuu hooda leeyahay, hadduu kaa ammaan helo e

• Halkudhegidda ceebaha tolkaa, yaad heli taqaanaane
• Huqdi waa u meel ool, nimaad hilib wadaagtaane
• Laakiin intaad horukacdaan, ma hinqanaysaane
• Hareertaad jirtaan baylah baa, haw kasoo tidhiye

• Halgan baa socda oo ciidan, waa la isku haystaaye
• Heer waliba kii kale, inuu hororo mooyaane
• Nabad looma soo hoyan carriga, tan iyo Haabiile

• Adna hoygii laynagu dhalay, yaad ka harjadaysaaye
• Waligay hal tuulana ma maqal, meel aad hanateene
• Dadkii wuu hayaamaye, maxaa xeebta kugu haysta?

• Intaadse aniga igu hawlan tahay, eed i hadal  hayso
• Haaraanka beenta ah intaad, igu halgaadayso
• Ogaadeen habdoole iyo intaad, habad ku sheegayso
• Cali Dhuux halbuu yidhi, intaad higiro moodayso
• Haddaad heerin weyn tahay, maxaad hawl ah ood qabatay?

• Wixii hore aan kaba soo hadhoo, haayidii dhiga e
• Hadda Habar-Dugaageed, sideed Huurso ugu raacday?
• Intuu kuu hogaansaday siduu, hilibka kuu siiyey?

• Hoomaaq  la ii qoday sideed, hog ula saynsaabtay?
• Ma halmaantay Iidoor siduu, hanaqa kuu gooyey?
• Hindisa sideed ugu darteen, hiilka Gadabuursay?

• Heshiiskii aad la gaadheen Gurgure, yaa isu kiin heegay?
• Sowdigii hordhalad baan ihiyo, hanadka ii sheegtay!
• Halkay aaday boqortooyadii, laydin yidhi hooya?

• Ma wax idinku haystaa jirood, hawl la qaban weydo?
• Inaad hanatid soo kuma wacnayn, ood hormuud noqoto?
• Maxaa hoos-ka-tuurka iyo xinkiyo, hagaga baas keenay?

• Sidii magacan laydiinku huray, uma hagmaysaane
• Hayinna kuma wanaagsana inuu, heeryo diid yahaye
• Ma horqaada geediga ritigii, aan hogaan barane
• Idinkana habdhaqankiinu, waa mid aan haboonayne
• Hayalsami inaad yeelataan, la hubsan doonaaye

• Hadalna lagaga maahmaah, abuur waano ka horeeye
• Ruuxii hurdeed toosisaa, waysla hebelkiiye
• Qof hadduu habaabo oo lumo, oo hero deydayayo
• Halkuu aaday gurigoodii baa, ula haboonaaye
• Bal agow hadduu hubo, cidlada uma hadaafeene

• Hartiyowda magacaa iga maray, haybta guudnimo e
• Inta kale hujuunkoodu waa, iaga hadhaayaaye
• Hawaadee ujeedadana waa, laysla helayaaye

• Habarwaa tolkood kagama baxo, hawl la qeybsadaye
• Warsangalina maan helin, waxay naga haleeyeene
• Walibana hanaan gobonimiyo, haybad lagu sheegye
• Dashiishana intuu hiiliyaa, hilibku diiraaye
• Majeerteen hareertaad jirtaa, layga haadsadaye

• Hanbalaalaqsanideenu waa, hohee daraadaaye
• Mana waydaan waxaad harawsato, oon kuu aqoon horaye
• Anna waanigii kaa hanjabay, kaana haajiraye
• Laakiin hawadintiinu waa, noo hurti la’aane

• Hurgumo iyo calool-sumo inay, heerka kala gaadho
• Anigoo raggaan la hadlayow, hiiftan ula jeedin
• Haansaabka gabaygaygu waa, inaan hagaagnaaye

• Heshiis daacad ah oo waxaan rabaa, aan ku hiranaaye
• Waxaan u hanqal taagaa midnimo, loo hogaansado e
• Lamaba hubase laakiin inaan, idin helaynaaye

• Ninkastoo idiin habar-wacda, oo gacan idiin haadsha      
•  Hinjijiirsan maysaan intaa, hagaro beeshaane
• Arintiinu waa ‘ha iyo alif’, miim la hoos dhigaye
• Arintiinu waa ‘ha iyo alif’, maya ku hoostaale

• Hadal iyo dhamaantii runbaan, idin hiraabsiine
• Gacal heelan baan ahay, ma qabo hiijo godobeede
• Haansaabka dulucdeeduna, waa hooya kaalaya e

• Haah iyo haddii aydaan haye, iyo odhanin hawraarsan
• Oydaan habsami weyn u qaban, hawsha dhiniciina
• Ama aynaan hanaan lagu qanco, iyo hadaf cad noo sheegin
• Yeynaan is haaraaman waan, kala hadhaynaaye
• Anna maalintaan libinta helo, een hantiyo guusha
• Walee Hebel Saleebaan danbow, kulama haasaawo