Dagaalkii 2aad ee adduunka markii uu socday ee ay quwadaha shisheeye ku hardamayeen Geeska Afrika ayaa waxaa indhaha Soomaalidii reer guuraga ahayd ku badatay diyaarado samadaa lalaya.  Inkastoo Daraawiishtii Sayid Maxamed diyaarado Ingiriisku ku rusheeyey, Soomaalidu aad uma aysan famahsanayn rooblaanadaa cirka lalaysa ee dushaa sare wax kasoo halgaadaysa. 

Waxaa haddaba dhacday in dadweynuhu ay weydiiyaan raggii aftahanada ahaa bal inay sifeeyaan walaxdan jini ee dadkii rucbiga ku abuurtay.  Raggii haddaba arintaa ka gabyey waxaa ka mid ahaa Maxamuud oo tiriyey gabaygan yaabka leh ee hoose.  Wuxuu ku bilaabay:

1.      Cirka waxaan sallaanku u sudhnayn, sida sayaariinta

2.      Oon saraca hoosiyo arlada, cagaha saaraynin

3.      Oo siifadduu kaga hanqarin, haadku sare joogsan

4.      Oo laga salsaliyoon lahayn, siigo iyo leexo

5.      Oon lagu salaaxayn haddaad, Sumuc ku liishaanto

6.      Belaayada qalbiga suurisaye, samada xiimaysa

7.      Oo sool dhexeetiyo hawada, sulunsulxaynaysa

8.      Oo gaal sameeyoon Illaah, nolol u suuraynin

9.      Baa sebenka Ciid looga tegay, sabashadeediiye

10.  Oo sanada dayrtiyo arlada, loogu suudalaye

11.  Dhulka wixii socdaa laga holaa, samay colaadeede

12.  Xagga sare wax kaa dilahayoo, sun iyo baaruud leh

13.  Oo aanad dagaal lagu sardamay, kaga sed qaadaynin

14.  Inaad samirto mooyee ma jiro, waxaad samaysaaye

15.  Sarsar awdan saamo iyo aqal, siibad iiyo daaro

25.  Wax sawaabka haadeed leh baa, saabtay dunidiiye

26.  Sintuu dhigay Amxaarkii lahaa, seerahaan jebine

27.  Kolka adigu Soomaliyeey, qaado samirkaaga

28.  Oo dhaha "Sinyoorow" na daa, waanu soo geliye!!