Masafadan hoose wuxuu Sayidku u mariyey nin ay col ahaayeen oo Cali Dhuux Aadan Goroyo la odhan jiray. Cilladaha uu gabayga mariyey Sayidku ee ku caayey ninkaa ay is nebcaayeen waxaa ka mid ah diindaro, been, fulaynimo, gaal-la-joognimo, abaal dhac, iyo kuwa kale. Cali Dhuux gabayaa caan ah ayuu ahaa hase yeeshee maadaama oo ay rag diriray yihiin, Sayidku xataa gabayaanimada Cali Dhuux wuu durayaa. Rag is qoomay uun kasoo qaad. Wuxuu yidhi Sayidku:
-
Nimaan sharaxa diimeed
Sheynaba ka suurayn
Hadii aad u sheegtana
Shaqfadloo aan gararayn
Adiguna aad sheekh tahay
Isaguna sharmuud yahay
Oo kula shikaayoon
Illeen waa shiddiyo hoog
-
Nimaad gabadh la shaaximay
Shuqduf ilaxidh ugu gelin
Oo shuqul gobaadeed
Shararraaxin ugu dari
Oo sheemadii geel
Boqol xerada ugu shubi
Oo shaharka jiilaal
Shabcanaaya caanaha
Oo sheelka gurigaa
Shirka talada loo wici
Oo kuu shisheeyaa
Isna waa shiddiyo hoog
-
Bal nin adiga kuu shara
Adna adan shaxeexayn
Shuqulkii yimaadana
Shiqiyoo aan yeelayn
Oo aan shaqaaqiyo
Shuushuuda deyneyn
Oo shiranka madashaa
Sheeddoo isaga bixi
Oo shalay wuxuu dhigay
Maanta kuu shirtirinayn
Shareecadiyo khayrkana
Shifta aan ka dhiganayn
Shaata haddaad ka baridana
Shanshada kuugu dhigahayn
Oo shuuqiyoo kari
Ibleys baa shidaayee
Shanfac oday Alluu-naar
Isna waa shidiyo hoog
-
Bal nimuu shakaashoo
U shaqeeya Ferenjiga
Oo shan iyo toban beri
Shaabuuga lala dhici
Shafshafana la siinayn
Kolay shaata mida tahay
Oo shaaca waaberi Cadan
Shacabka ugu kici
Aan shuuna oranayn
Isna waa shiddiyo hoog
-
Bal nin gaal la shaarugay
Shaabbaddiina lagu dhigay
Oo shurugga fuudoo
Shaarubbada aan xiirayn
Oo ama shukaan wada
Ama shuqul kaluu qaban
Muslinkana shabbihid kule
Isna waa shiddiyo hoog
-
Bakhayl shaacug weynloo
Shiila duxa aan lagu qorin
Oo kuu shumbucullayn
Intuu maro shullaha dhigo
Oo sheegiyoo been
Shaadir barale kugu wadhi
Oo kuu shafeecayn
Isna waa shiddiyo hoog
-
Nin shaaficidu reebtee
Ku shuhroobay fulannimo
Shimbirahana aan hubin
Hadday shababaxleeyaan
Oo aan shahiidkiyo
Shiishkiyo xarbada tegin
Sharaarna aan deyneyn
Isna waa shiddiyo hoog -
Gabay niman shib ka ahayn
Misna shaacir ku ahayn
Aan shaqalka ugu dhigin
Madka iyo khifiyo shalaq
Oo xarafka sheegiyo
Xuduuddana shirrabihayn
Oo shooliyoo odhan
Shafkaygaa wax jiifaan
Sheegaye midkaasuna
Isna waa shiddiyo hoog