Gabaygii Salaan Carrabeey ee Guba 2

• Haadaaqsi gabay waaya dheer haansa ma lahayne
• Hiirtaanyo godobtaan ku nacay hibashadiisiiye
• Hawaala warran mooyee si kale wawga haayiraye
• Goortaan hammiga gaabsadaa layla hiishadaye
• Hadba nin igu haansaday anow hela jawaabtiise
• Dhaaxaan mid hanaqaad is biday so hoggaan baraye
• Tixdaan hiddiyo haaneedsigaan hoodo ku lahaaye
• Hal abuurka layguma hiigsado soo hadaaf baxay
• Hooyaalayntaan kaga badshaa haybad iyo luuqe
• Haasaasahaa laga gartaa hagar la'aaneede
• Mar haddaan hullaabta iska rogo soo hankaabsadaye
• An hawadiyo hoosada Burciyo Herer ka geeyeene

• Kuma hiilo heeliga fulaa la handabeeyaaye
• Anse waxaan haagaag uga marshaa heel la ii wacaye
• Inaan oday hangaafa ah noqdiyo haydhaf la i moodye

• Hig ma siiyey hawraarta way kala halleeyaane
• Heeraabta ma u dhigay intaan heesna daba joojey
• Maansaba hogbay leedahee meel ma ka habawshey

• Afartaa intaan ha'da ka deyey hilin ma qaadsiiyey
• Caawana hiyiba waa hiyee hadal kalaan baanay

• Halaq didaya waw halis nimuu boqon haleelaaye
• Waabeeyo lama hoorsan karo huurtayoo kariye
• Wiyil lama hunjaalliyo adoon hootana u sidane
• Laga haarri hooriga libaax soo hamaansadaye
• Nimanbaa maroodiga hunduda haamahuu sida e
• Hayinnimo markii lagu arkay haragga saareene
• Hoobaaq mid waw qodi jirey heegadiyo roobka
• Baddoo huguntay hoorriga sabaac ee lagu halaagmaayo
• Bal maan hakiyo hir u laacaybaan ku hafin doonaaye

• Caloow laguma helo geel sidaad u handanaysaane
• Qabiila hindiyi maalinbay ka hinjisaa duule
• Idinka hoostay meel uun haddaa hollin lahaydeene

• Hadhuudh daatay idinkaa ka qaday haqab la'aaneede
• Damal Haajihii laga hirqaday ways hunda ogeyne
• Waatii lagaa hiray adoo qaba hammuuntiiye

• Huwan maraga waatay ahayd hadhaci waabnaaye
• Hadiyad miyaw bixiseen nafta unbaa hamadiseene
• Nin sagaaro heetaynayoo haaban kari waayey
• Oo aan hunguri waa shiddee had uga yaabaynin
• Haawaydu kama maaranteen heejigaa dhalaye
• Haleelada ma daayeen nin cunay hilib ugaadheede
• Haaraanka iyo faanka wayska hidda raacdeene
• Rag haddaad u haysiyo barbaar halabsatoo fuusha
• Mar unbaad u heensayn lahayd hawl yaraan subaxe

• Heegaale kama qayliseen hoga kaliileede
• Goortaan hadhkaba kaa eryaad hawd u cararteene
• Waa kaa hubkii sida raggii wada hareednaaye

• Habarwaana waa kaa hingilan labadii haamoode
• Shirsooruhuba hoy maleh kuwaad hilib wadaagtaane
• Waa kaa hayaankii ku dhacay Hobyo iyo xeebe

• Ararsame ma haybsado nugaal hogashadii ceele
• Hanas iyo abaar kulul adoo habaqle soo guurey
• Caynaba hadhuub kama dartaan hoga kaliileede
• Ka hulleele Hagar Aadankii hoobalayn jiraye
• Adunbaa hayaayda u guntane heeryo lagu saarye

• Afartaa ha'da intaan ka deyey hilin ma qaadsiiyey
• Caawana hiyiba waa hiyee hadal kalaan baanay

• Habar Yoonis waataa hantiday haradii Ciideede
• Iminkay Hundiyo reer fureen harawidii Faafe
• Intay hootadii garab dhigeen himidhna loo geeye
• Ku hinjiye colkay humin jireen Caliyo Haaruune
• Wax Ammaadin webigaw hardiyey harabku waa khoofe
• Huurkii shabeelluu galee hure banaaankiiye
• Huubhuubsigii lagu idlee horintii Jeeraare
• Nimankii hawada weyn lahaa haatan lagu leefye
• Ka hidiidnay hodankii barqiyo hibadii Ceel Fuude
• Hayruufka Dalal bowga dhiman hegerbi Daaroode
• Maantana hablaha loo dhisay ku hamranaayaane
• Haydaaro cadaw looma turo heermay boqontiiye
• Ma hanbayne dunidii hantiye tan iyo Hiiraane

• Adunbaa hinaasiyo u jilan haawis iyo ceebe
• Haadaa qabiiliga Isaaq hibo Ilaah siiye
• Aniguna halkaad degi jirtaan ka hawisaayaaye
• Hadba waxa ku soo gocan sidaan kuu harraatiyaye
• Hibashada xun waa lagu yaqaan Habar Xabusheede
• Waataad haween nagu xustee haad ma ku cunsiiyey
• Dabadeedna hoog iyo hungiyo ciil ma la huleeshay

• Tolkaabaa horweyn ku habbanoo haanka loo tolaye
• Waataa hareertaada Bari looga hoy dhigaye
• Wax hortiina lagu maalayaa kii Hagoogane'e
• Humbanidan Ogaadeen intaad soo hirgelinaysid
• Habqankii firxaday Gorod Xirsaa caydh hadaadumaye
• Iyagaa hiraabtiyo kallaha hiirta waaberiye
• Haddaad ficil hinaasiday asaad hiilin kari weydey
• Ma afkaad ku hawl bixi cidlaad ka hanajabaysaaye?

• Afartaa ha'da intaan ka deyey hilin ma qaadsiiyey
• Caawana hiyiba waa hiyee hadal kalaan baanay

• Inkastoo habkay gobi lahayd hadiyad loo daadsho
• Huunbaaqsigu uma ekeeyn Habar Majeerteene
• Hubsa dhaha Hartigu waa og yahay haarihii Muduge

• Hiinraaca waa lagu yaqaan hiida doqoneede
• Hebednimada qaarkeed aday kuu had noqotaaye
• Bal inuu hanfade waalan yahay habi la'aantiisa
• Hadmuu ku hirtey Cali Yuusufkuu humay colaadiisa?

• Ninna haybta kuma raaci karo hooyo aan dhaline
• Hogagelise cadawgaa bahdiin u handanayseene
• Iminkaad la wada huudanteen hohiyo waydiiye
• Habaarkii la hele reer Taleex hiifkii loo qabaye
• Ku habli'idin hebel toogadaad dad u heshiiseene
• Waa taa shisheeyuhu hantiyey ma hurtadiiniiye
• Nabsaa ku haya hagardaamo gacal hadimadeediiye
• Inkastuu higaad qabo haddaan anigu soo haabto
• Waxaw halisa badaw hayjad galay inuu habaabaye
• Xaajada badhbaa la hojiyaa huga la saaraaye
• Haasaawuhu uma ekeyne wuu hadadafaayaaye
• Hula xumada uunkoo hurduu col u horseedaaye
• Hoosiisku waa qaadi jirey belo hugmaysaaye
• Waa kaa hilaacii u baxay haatufka ahaaye
• Kol uunbuu hilawluhu u tumay heello iyo jiibe

• Dadka kale tashiga waa hojaa kay hadhaw noqone
• Waxaanu hubsan reer Cali Geraw haa dhawaan jiraye
• Waa wuxuu wadaadkii ku hodey Habar Saleebaane
• Ayagaa hoggaanka u ahaa hororkii waagiiye
• Halligaa markaad sheegateed hulakadaynaysey
• Waa taad Bah Geri huudiddeen hanadadoodiiye
• Kuwii Boqorka hadateediyee hiijiyaad tahay
• Haarti aa badeen baa khaligu hiifayaa weliye
• Maantana hannaankaad waddaa waa halkii abide
• Dabkaad hurin habeen iyo dharaar halacyadaad oogi
• Halna kuma xereyside dadkaad ku hawaraysaaye
• Aduunbaase hor Eebbiyo la tegi halaci naareede
• Iska hadhaye aakhiraba waa lama huraankiiye