Afar maalmood ka dib, sida la wariyey, waxaa gabaygii Cali Dhuux ka jawaabay silsiladiina soo galay Ina Dubbe oo yidhi:

• Deyn qaadka gabay waa xun yahay, dira-diraaluhuye
• Duq gaboobay waxa u roon afkii, inu daboolaaye
• Marse haduu duleeddada ka ciyo, waa darxumo weyne

• Damenaanse Caliyaw rag waa, laga dambeeyaaye
• Darbo waxaad Islaam kula jirtoo, dab isu dhiibtaaba
• Dux ka guro dib uun baad u dhiman, duuga weligaaye

• Dersi sidaanu nahay oo ciyoon, lana duqeynaayo
• Daandaansigaagii ka baday, digada xoolaaye
• Dacwiga jooji yaan eebahay, dawdar kaa dhigine

• Ninse dulmiyay Ogaadeen, hadii cidi ka doonayso
• Dunjigeeda Soomaalidaad, ugu darnaydeene
• Duuflaal wadaadkii noqdaa, dawo ahaydeene

• Idinba waataa dubaha Reer Subeer, daan ku jabiseene
• Idinkaa Dannood iyo ka hiray, degeladoodiye
• Daratoole iyo Faafan oo, wada duraabaaya
• Deegaanta Haradoo dhanbaa, dacar ku deehdeene

• Deex iyo madheedh kama baxaan, gorayo daaqayne
• Doogoo gabaabsiyey haadii, dayrta la idlaysto
• Laaskuu u dalandooliyaa, daar ka dhigateene

• Dixdii Qarandi waataa khalfado, dab u samayseene
• Dunbuqaa ka soo jeediseen, loogu degi waaye
• Dararkii Camuud baa shan mayl, doho ka siiseene

• Sidii daamur waatii gargaar, duuf ka soo uraye
• Dhagaxii Mataan lagu dugsiyay, deyrki lagu meershay
• Jeer aan daqiiqaha ka dhigay, Doollo laga caagye
• Hog dheer baan diniin laga cabayn, duraha jiilaale
• Waa taan wadaan qudha la darin, toban diraacoode
• Docnaba looma qoyn jeer aan, degay afmeerkiiye

• Darandoori looguma horayn, dararka Gaafawe
• Dukaanada waxaa dhigay ragii, dahay Wadaadkiiye
• Waxanan ugu dabaal degay markaan, helay dalleentaase

• Dooy iyo Doh Faafka iyo, Dubuxulkaad sheegtay
• Meesha iyo dirkii Xaawa iyo, Duudkii Nebi Aadan
• Inaan jeesna naga daaqahayn, daacadaa furiye

• Denbi iyo xasarad baa Ilaah, kuugu dawgalaye
• Dariiqada Janada loo maraad, dacal maraysaaye
• Diintii Rasuulka iyo sharcigii, baa lagaa dadaye
• Nin dardaarnkii seegayoo, doorsan baad tahhaye

• Afartaa dawaarkii dharkoo, dihin ma raacsiyay
• Deelqaafku waa ba'an yahee, daaqsin maw mariyey
• Ma daliishay qawlkii runaa, laabta kaa dega'e
• Da'dii hadalka laga fiiriyey ee, lana dareensiiyay
• Ana kama duwine eray yar baan, deelka ka higgaadshay

• Daarood hadaad tahay ood, hilbaha uga dubaaxayso
• Guutada kolkuu Macallin Dool, ugu dawaafaayay
• Adna sidaa cir danabloo onkaday, doobba karinaysay
• Diric naaska nuuga iyo markii, gabadh la dooxaayay
• Dalbashada salaadii markii, gaadhka lagu dayray
• Dabkii lala dhacaayaa dheguhu, nala dilaaceene

• Degmada Reer Amaadiin iyo Camar, debec ma maalaane
• Waxa Caabud Waaq laga didsaday, kii dabrayn jiraye
• Ku dulayste Awyaal intii, ugu dan roonayde
• Damal Haaje waataw waddeen, duurkan oo kala'e
• Daahyaale oo qudha maxaad, ugu dallaabaysay

• Shaxda lama degteen Reerhii, cunay dugaagiiye
• Hadba diilin lama jeexateen, qoomki Reer Dalale
• Doyaysi uma jiifsateen, dahar ay waabeene
• Dee hadal waxbuu soo duwaa, gabayga maa deysid

• Afartaa dawaarkii dharkoo,dihin ma raacsiyey
• Deelqaafku waa ba'an yahee, daaqsin maw mariyay
• Ma daliishay qawlkii runaa, laabta kaa dega'e
• Da'dii halka laga fiiriyay ee, lana dareensiiyay
• Ana kama duwine eray yar baan, deelka ka higgaadsay

• Dagaal iyo dhac waa lagu ogaa, duul shisheeya ahe
• Iyaguba kun jeer bay dunsheen, dawlada Isaaqe
• Ragii saca danaaniyay baqaa, daadshay qalabkooda
• Ee aan isdeyin jeer oo, hooris lagu daashay
• Eed qoodhha dogoblaw lahayd, sidii dameer weyda
• Waxaad tahay dabay cudur sidoo, aan layska daadayne
• Bal maxaa ka daran ceeb hadii, laysku dili waayo?