Gabaygan Maxamuud wuxuu ka tiriyey geelii faraha badnaa ee labaxay Indha Badane ee Ogaadeenku kasoo mooro duugay Isaaq dagaal xun dabadii.  Wuxuu abwaanku ka sheekaynayaa siddii colka loo abaabulay, hubkii iyo saanadii uu Ogaadeenku watay, awoodii ciidan ee ay dul dhigeen Isaaq, geela farihiisii iyo siddii la isugu keenay ee la isugu duba riday, siddii loo soo kaxeeyay kadib markii lasoo qaaday, iyo in aan inna wax khoof ahi jirin oo siddii geel jabadii uu saaka ka foofay usoo dheelmad ah ayaar aaranka, ilamaha, iyo duqaydaba lasoo dalandaleeyey. 

Wuxuu abwaanku ku faanayaa in uu isagu abaabulka lahaa oo ciidanka abaanduule sare ka ahaa.  Ugu dambayn Isaaq ayuu wuxuu ku sheegayaa in aysan geelaba istaahilin inay dhaqdaan ooy adhiga uun ay tahay inay ogaadeen.  Daaroodna wuxuu lee yahay waa raggii geela lagu yaqaanay ee asal iyo faracba u lahaa.  Ma dhana gabaygu oo aad buu u dheeraa inta maqan xilliggii la helo waa arigtideeda.  Wuxuu yidhi: 

• Ilmadiid ma fiicnee tolkay, maysku wada oogay

• Laba Aadan iyo Nuur Ayuub idanki, maw dhiibay

• Abaanduulihii Muxumed Gool, ubaxa maw saarey

• Ma addayney eyrooy jidkuu, abadhku qaadsiiyey

• Ilaalada ma loo direy halkii, lagu itaalaayey

• Ma soo aragtay dhuur-aaddaney, araddaday joogtay

• Ilayskiyo dabkay noo shideen, gelin ma sii aadney

• Anoo salalay Aaskoo dam yidhi Olol ma ii kaahay

•  Oogtiyo dabkay ii shideen, galin ma sii eegtay

•  Libdhada oo in dheer le'eg miyaan, weerar ku ekeeyay

• Ma unkaday jigraha aaddan, iyo ulayar maadhiinku

• Ma ikrimay nin aardoonayaa, uurnugeyl ma lehe

• Abeesaale iyo qoorbidaar uuro mays qabatay

• Ma adkaaney erigii horey, ku ishiqaateene

• Ma ajalay nin aar doonayaa, uur nugayl ma lahe

• Ma irkaagay Iidoor wuxuu, eeday baa helaye

• Kuman uguba kuman uur leh, iyo kuman ilwaad-guun ah

• Iyo kuman ilweyntiyo duqiyo, aarankiyo qaanka

• Iyo Kuman abaartii dhaloo, ubadka loo maalo

• Iyo kuman intay igadh yihiin, laga unuungooyey

• Iyo kuman abeereeyey oo awrta la ciyaarta

• Iyo aragsamoow baarqabkii, ayra lagu qooqshay

• Intaasoo kun wada ayniyaan, ku eryey qaadhkiiye

• Iinsha-Allaahuye intii ka hadhay, baan ururin doonaaye

• Sidi Janan albaabada xidhoo, eemar laga dhawri

• Ama sida ammaradii horee, Adari oo koodhay

• Ama awlal malab oo shininadi, uumi uga yaacday

• Nin arkaa asheed maalintaan, wadanay eeraaane

• Awaleyda waa tay lahayd, ololka muunayse

• Haddii ay itaalkeed hayaan, naguma eegeene

• Aashaa wad mooyeen, Cillaan orodkii maw diidnay

• Iyadoo aleemo leh miyaan, aayar daba-luudnay

• Ayax iyo sidii daad miyaa, layga amakaagay

• Ingiriis miyaa lagu matalay, aalladdaan wadanay

• Iidoorki saw sida tukaha, kuma ag meereysan

• Indhabadane nimankii lahaa, ududsan maayaane

• Waxaa geela aanaysan jirey, ubaxa Daaroode

• Awal horeba kuma aadanayn, adhi-fadh Iidoore

• Ergisaad u hayseene haw, uur xumaanine

• Inshaa Allaahu kii hadhayna, waan urursanaynaaye

• Idahaaga dhaqo geel ninkii, odey lahaa raacye, ama

• Idahaaga dhaqo geelu waa, ehel ogaadeene

Haddii aad hayso inta ka dhiman ama wax khaldan aad sixi karto, fadlan noo soo xuluuli hoos ka taxanta Internetka.

Deeq Sayid Kaariye ayaa beydadka qaarkood soo saxay.  Mahadsanid Deeq.